Este proxecto facilitoulles o abastecemento de auga aos 1.824 habitantes da localidade de Carantaba, no norte de Guinea-Bissau. Para garantir o dereito humano á auga, levouse a cabo a rehabilitación dun pozo con sistema de bombeo electrosolar, a construción de dous depósitos en altura e a instalación dunha rede de distribución cuns 1.000 metros de canalizacións. Ademais, dispuxéronse catro fontes públicas e dúas tomas domiciliarias, unha na escola e outra na residencia do profesorado. A actuación levou aparellada unha campaña de sensibilización sobre prácticas hixiénicas que se estendeu tamén ás comunidades de Santa Curtiba e Santa Nie, chegando a preto de 3.000 persoas. O correcto transporte, almacenaxe e tratamento da auga, canda a hixiene persoal, doméstica e alimentaria, foron algúns dos contidos abordados a través de visitas porta a porta, demostracións prácticas, charlas comunitarias ou distribución de carteis. Pretendíase así promover un uso racional e reducir a incidencia de enfermidades directamente relacionadas con estes procesos, como a malaria ou a diarrea. Ademais, formouse un Comité de Xestión de Auga e Hixiene, integrado maioritariamente por mulleres, e impartiuse un obradoiro de introdución á fotografía para as veciñas que culminou nunha exposición.