Tras doce anos enviando a persoal das deputacións e concellos socios a colaborar cos parceiros en terreo a través das Vacacións con Traballo, en 2017 o Fondo Galego decidiu darlle a volta ao programa, dado que unha demanda frecuente dos municipios do Sur viña sendo profundar nesta cooperación técnica, de xeito que o seu funcionariado se desprazara a Galicia para formarse en diferentes materias dentro da administración local.
Neste senso, o programa Vacacións con Traballo en Galicia ten como misión fortalecer ao persoal técnico municipal dos países nos que traballa o Fondo Galego, para o que se procura un intercambio de experiencias naquelas deputacións e concellos dispostos a facer de anfitrións e cunha traxectoria destacada na área sobre a que se busca o fortalecemento. Ao tempo, promóvese a sensibilización entre as entidades socias do Fondo Galego sobre a difícil situación dos países empobrecidos e as súas potencialidades.
Deste xeito, a través do programa viaxan a Galicia técnicas e técnicos municipais ou de asociacións de municipios dos países cos que mantemos unha relación de cooperación. Durante a súa estadía, visitan varias administracións locais galegas nas que coñecen a experiencia de xestión nas áreas remarcadas como de maior interese segundo o seu perfil. Ademais, reúnense con diversos colectivos, manteñen encontros co alumnado, ofrecen charlas, etc.