Especialistas en cooperar

Especialistas en cooperar é un programa de cooperación técnica dirixido a persoal dos concellos, deputacións e mancomunidades de Galicia. Durante un período de dúas a catro semanas, as persoas participantes asesoran en terreo aos nosos parceiros sobre aquelas materias que solicitan, no marco dos proxectos apoiados polo Fondo Galego no Sur Global.

A cooperación técnica é unha das ferramentas máis potentes e distintivas da cooperación internacional ao desenvolvemento impulsada polos gobernos locais, pois supón aproveitar o know how dos municipios para reforzar as capacidades das administracións públicas e asociacións das sociedades máis desfavorecidas, facilitando respostas profesionais e formación adecuada ás súas necesidades. Ao tempo, favorécese o intercambio de experiencias e un maior coñecemento da realidade dos países aos que apoiamos.

Especialistas en Cooperar toma o relevo do anterior programa de voluntariado internacional Vacacións con Traballo, que ao longo de catorce edicións enviou a 46 técnicas e técnicos de 32 concellos e deputacións a colaborar en áreas como turismo, arquitectura, traballo social, igualdade, emprego, finanzas, bibliotecas ou informática en Nicaragua, Cuba, Perú, Mozambique e Cabo Verde.

No entanto, en ocasións Especialistas en Cooperar cambia de dirección e é o funcionariado do Sur Global quen se despraza a Galicia para profundar nesta cooperación técnica. O obxectivo é fortalecer as capacidades dos municipios e asociacións de municipios cos que traballamos, compartindo coñecementos naquelas deputacións e concellos dispostos a transmitir as súas boas prácticas de xestión nas áreas de interese sinaladas. Ao tempo, promóvese a sensibilización entre as entidades socias do Fondo Galego sobre a difícil situación dos países empobrecidos e as súas potencialidades.