Un grupo de alumnas do Colexio Maria Assumpta (Noia) vén de gañar a fase estatal do certame audiovisual #PeopleOfTheFuture, que busca promover estilos de vida sostibles entre a xente nova. As estudantes Claudia García, Lucía Maceira, Zaisyah Pérez e Paloma Vázquez son as autoras da peza ‘Os 3R poden salvar a Terra’, que agora precisa o máximo número de reproducións para vencer a nivel internacional, onde compiten con mocidade doutros sete países da UE e de Cabo Verde. O vídeo pode verse na canle de Youtube ‘Water of the future’: https://youtu.be/X0Ns496-UOk.
O concurso está organizado no marco do proxecto europeo People & Planet, no que participa o Fondo Galego de Cooperación e Solidariedade, asociación de administracións locais da que forma parte o Concello de Noia. As estudantes de 4º da ESO realizaron o seu vídeo dentro dunha campaña contra o cambio climático e coidado do planeta impulsada desde a materia de Bioloxía, que imparte a profesora Mónica González, na que tamén elaboraron murais, dípticos, etc. para promover a reutilización e o cambio de hábitos.
O xurado estatal estivo integrado pola xornalista Natalia Puga, especialista en comunicación para o desenvolvemento; a activista Ana Díaz, membro de Ecoloxistas en Acción, e mais o técnico de Mocidade Jaime Bello, do Concello de Boiro. Valorouse tanto a creatividade como a claridade técnica e expositiva, así como o pensamento crítico e o compromiso amosados. O premio consistía nun ecopack de produtos e actividades na natureza, mentres que agora as vencedoras teñen a posibilidade de obter unha praza para un campus internacional en Lisboa. Neste caso, para decidir o mellor vídeo constituirase un novo tribunal, pero tamén terán un peso importante as visualizacións colleitadas antes deste venres ás 14 horas.
Axiña se lanzará ademais a segunda edición do certame #PeopleOfTheFuture, polo que a xente nova de entre 15 e 35 anos pode ir elaborando as súas cápsulas audiovisuais para promover a xustiza social e climática. Basta con gravar un breve vídeo, no que a persoa identifique un problema local ou global e explique o que xa fai ou pode facer ao respecto, dado que os grandes cambios comezan con pequenos xestos.