Bruxelas, 23 de febreiro de 2024. Dúas integrantes dos Consellos Climáticos Xuvenís dos concellos de Teo e A Guarda veñen de expoñer en Bruxelas a súa experiencia como activistas medioambientais da man do Fondo Galego de Cooperación e Solidariedade, entidade da que ambos os dous municipios forman parte. Irene Iglesias e Marta González, respectivamente, están a intercambiar boas prácticas no eido da acción climática canda mocidade doutros tres países implicados no proxecto europeo ‘People & Planet’.
As actividades en Bruxelas deron comezo onte cunha visita ao Parlamento Europeo, onde a delegación foi recibida pola europarlamentaria portuguesa Sara Cerdas, que lles explicou o funcionamento da cámara e lles animou a trasladar as súas inquedanzas. “É moi importante que esteades aquí para traernos aos decisores políticos de volta á realidade, non esquezades que estamos para servirvos e representarvos”, sinalou. Cerdas lembrou que “máis do 70% das leis estatais veñen determinadas polas políticas europeas”, polo que incidiu na necesidade de votar nas vindeiras eleccións de xuño.
As mozas galegas compartiron a continuación a súa experiencia como voluntarias ambientais na mesa redonda que se celebrou na Dirección Xeral de Partenariado Internacional (DG INTPA), onde tamén inteveu xente nova de Portugal, Italia e Alemaña en representación dos 17 Consellos Climáticos Xuvenís creados nun total de nove países no marco do proxecto ‘People & Planet’, financiado polo programa DEAR da INTPA. Na nosa comunidade, estes grupos de traballo están a funcionar en Teo, A Guarda, Oleiros e As Neves, co obxectivo non só de promover estilos de vida máis sustentables, senón tamén de colaborar cos gobernos locais para impulsar políticas a prol do desenvolvemento sostible.
Alén de favorecer a reflexión e a sensibilización ante a emerxencia climática, tal e como compartirán tamén nun próximo encontro en Lisboa, os Consellos Climáticos Xuvenís de Galicia teñen a particularidade de que organizan as súas propias actividades en colaboración cos concellos, desde limpezas de praias e plantación de árbores ata campañas para reducir o uso de plásticos e roteiros por espazos naturais. Este aspecto foi valorado moi positivamente pola responsable de Xuventude da Dirección Xeral, Thaïs Leray, quen remarcou o feito de que as ideas partan directamente da mocidade e que consigan apoio municipal para levalas a cabo.
A comitiva galega pechou a xornada na Fundación Galicia Europa, onde tamén tivo a oportunidade de presentar o proxecto e de coñecer o funcionamento desta oficina que defende os intereses galegos ante a UE da man da súa directora, Ana Ramos, e de todo o seu equipo, que á súa vez lles explicou as oportunidades que ofrecen para a xente nova.
Abertos a novas incorporacións
A participación neste intercambio está a ser “unha experiencia do máis interesante, na que puiden coñecer as testemuñas doutra xente nova e aprender como funciona o Parlamento e outras institucións da UE”, en palabras de Irene Iglesias, de 16 anos, que regresará a Teo “cunha morea de información e ganas de seguir traballando”. No mesmo senso, Marta González, de 26, asegura “volver con moitas ideas para aplicar na Guarda”, ao tempo que pon en valor “ter coñecido a mozas e mozos de diferentes países, visitar lugares aos que pensaba que nunca acudiría e coñecer o funcionamento do proxecto ‘People & Planet’ a nivel europeo”. Ambas as dúas chaman ademais á mocidade da contorna a participar nos Consellos Climáticos Xuvenís, que ofrecen vantaxes como estas viaxes internacionais.
O programa en Bruxelas continúa hoxe de novo na DG INTPA, onde abordarán aspectos relativos ao Green Deal, a axenda dixital, a igualdade de xénero ou os dereitos humanos. O itinerario pecharase no Foro Europeo da Xuventude, que dá voz á mocidade en Europa, reivindicando os seus dereitos e empoderándoos para teren un papel activo na sociedade.