O presidente do Fondo Galego e alcalde de Nigrán, Juan González, participa esta semana en Río de Janeiro no peche do proxecto ‘AccesoCidades: Cidades máis accesibles e conectadas’, en calidade de vicepresidente da Confederación de Fondos de Cooperación y Solidaridad. Esta iniciativa, cofinanciada pola Unión Europea, permitiu ao longo de tres anos que representantes municipais de Brasil, Italia e España intercambiaran experiencias arredor da mobilidade sostible, tal e como se está a facer tamén desde onte e ata mañá mércores durante as xornadas de clausura.
Despois de realizar diferentes visitas técnicas, Juan González participou esta mañá na apertura institucional do evento, onde tivo a oportunidade non só de poñer en valor a aprendizaxe mutua que supuxo coñecer as boas prácticas dos distintos países, senón tamén de expoñer ante uns 70 alcaldes, alcaldesas e persoas expertas as accións que o seu municipio está a impulsar neste sentido. Deste xeito, o alcalde de Nigrán explicou que “é unha honra poder achegar neste foro mundial políticas de futuro que nós xa estamos aplicando, como poden ser as electrolineiras gratuítas, o Nigranbus que conecta as parroquias ou a aplicación Parking Gapp para facilitar o aparcamento ás persoas con discapacidade”.
A exposición do Fondo Galego complementouse cun vídeo sobre o intercambio de experiencias desenvolvido en España no marco deste proxecto, onde a asociación municipalista participa a través da Confederación de Fondos e no que tamén están implicados o Frente Nacional de Prefeitos (Brasil) e a Associazione Nazionale dei Comuni Italiani. Responsables locais e persoal técnico de ambos os dous países puideron coñecer in situ programas como o modelo peonil de Pontevedra, Vigo Vertical, Bilbao 30 ou AMBici.
O obxectivo de AccesoCidades é mellorar as políticas de mobilidade urbana a partir de criterios de igualdade, tendo en conta os enfoques de clase, raza e xénero, de aí que este sexa un dos principais eixos das xornadas organizadas en Río. O emprego de datos abertos no transporte público, a sustentabilidade financeira, os modelos de operadores, a xestión metroplitana ou a accesibilidade universal son outros dos aspectos que se abordarán.