O propósito deste programa iniciado en 2013 era revitalizar a práctica agrícola e contribuír á xestión eficiente e eficaz da escasa auga potable da que dispón o municipio, eminentemente rural, a través do sistema de rego gota a gota. Coa dinamización da agricultura loitouse tamén contra a pobreza e pola seguridade alimentaria, xa que se garantiu que as familias con menores recursos puideran xerar os seus propios alimentos e mesmo obter algún beneficio da venda dos mesmos nos mercados locais.

Na segunda fase do proxecto, en 2015, formouse a 29 agricultoras e agricultores no rego ‘pinga a pinga’ e noutras prácticas agrícolas que permiten reducir os gastos e a auga empregada. Estímase que os 150 habitantes da localidade de Librão melloraron a súa dieta alimenticia e os seus ingresos grazas aos produtos da horta. Coa instalación deste sistema de irrigación, non só se favoreceu a seguridade alimentaria e a mellora socioeconómica nunha das vilas máis pobres do país, senón que tamén se preservaron as cuncas hidrográficas. Á escaseza de auga na zona, acentuada polo cambio climático, únese a crecente salinidade dos solos, derivada do avance do mar pola extracción de area e pedras para a construción. A esta actividade ilegal e cun forte impacto no medio dedicábanse algunhas das persoas beneficiadas pola iniciativa, entre as que se lles deu prioridade ás xefas de familia con máis fillas e fillos.