Logo da ofensiva militar que se produciu entre o 8 de xullo e o 26 de agosto de 2014 na Franxa, o Fondo Galego decidiu apoiar os equipos de saúde mental que atendían á poboación refuxiada no contexto postbélico. A doazón destinouse ao proxecto ‘Apoio psicosocial para as vítimas da operación Protective Edge en Gaza’, que formaba parte do Plan de Resposta á Emerxencia da UNRWA. Grazas á esta achega, preto de 1.500 persoas se beneficiaron das terapias impartidas por seis terapeutas durante dous meses. Realizáronse distintas actividades, tanto individuais como grupais, traballando desde o punto de vista da psicoloxía positiva.
Tras os 50 días de ofensiva, 2.254 palestinas e palestinos perderon a vida, incluíndo 538 menores, e máis de 18.000 casas quedaron destruídas. Todo isto danou o tecido social e debilitou os lazos existentes entre comunidades. Arredor de 375.000 nenas e nenos e 60.000 persoas adultas foron identificadas como posibles beneficiarias do programa de apoio psicosocial por múltiples razóns, como a perda de familiares durante os ataques, a destrución do fogar, os elevados niveis de estrés, etc. O obxectivo desta iniciativa era reducir a vulnerabilidade psicolóxica e mellorar a resiliencia para afrontar os efectos adversos que tiveran acontecido ou que foran acontecer.