A Asemblea Xeral do Fondo Galego de Cooperación e Solidariedade ratificou esta mañá as altas de dez novos concellos e mais da Deputación de Ourense, anfitrioa do encontro que se celebrou no Centro Cultural Marcos Valcárcel. A Pobra do Brollón, Cedeira, Coristanco, O Bolo, O Incio, Ourol, Salceda de Caselas, Trabada, Vedra, Xinzo de Limia e mais a administración provincial contribuirán á loita contra a pobreza e as desigualdades nos chamados países do Sur Global a través desta rede, que conta xa con 115 municipios e as catro deputacións.
O presidente da Deputación de Ourense, Luis Menor, deulles a benvida aos numerosos representantes municipais presentes, poñendo en valor a cooperación internacional impulsada polos concellos, como tamén fixo o presidente do Fondo Galego e alcalde de Nigrán, Juan González.
A Asemblea Xeral contou asemade coa participación do alcalde do Tarrafal, José dos Reis, e o concelleiro Osvaldo Chantre, que presentaron o proxecto de apoio ao desenvolvemento económico local deste municipio caboverdiano que está a impulsar o Fondo Galego. Tamén interviñeron dúas das integrantes do Consello Climático Xuvenil do Concello de Teo, María Blanco e Montse Mayo, que expuxeron esta experiencia como exemplo de boas prácticas no marco do proxecto europeo People & Planet, alén de compartir as súas conclusións finais.
Na xuntanza aprobouse tanto a memoria do pasado exercicio como o plan de actividades e o orzamento para este ano, que incorpora proxectos de cooperación directa en diversos países de África e Latinoamérica. A isto súmase a convocatoria de axudas a proxectos de ONGD galegas, dotada con 100.000 euros. No eido da educación para a cidadanía global, os concellos socios do Fondo Galego acollerán medio cento de actividades, que van desde teatro de monicreques sobre a poboación refuxiada ata encontros con mulleres palestinas, pasando por cinefórums, charlas ou exposicións. A orde do día incluía ademais a adhesión á Unión de Cidades Capitais de Lingua Portugusa (UCCLA), que tamén foi aprobada.