Un grupo de alumnas do IES A Sangriña vén de gañar a segunda edición do certame audiovisual #PeopleOfTheFuture, que busca promover estilos de vida sostibles entre a xente nova. Laura Rodríguez, Cayetana Berrecoso, Yurena Martín e Alejandra Iliescu son as autoras da peza ‘Consciencia do uso dos recursos naturais’, que anima a mudar de hábitos para combater o cambio climático. O alcalde da Guarda, Roberto Álvarez, e o concelleiro de Medio Ambiente, Óscar Alonso, fixéronlles entrega esta mañá do seu premio, que consistirá nunha ruta a cabalo.
O concurso convocouse no marco do proxecto europeo People & Planet, no que participa o Fondo Galego de Cooperación e Solidariedade, asociación de administracións locais da que forma parte o Concello da Guarda. Neste contexto, organizáronse obradoiros de videoactivismo ambiental en nove concellos, nos que participaron 228 mozas e mozos. Destas formacións, impartidas pola ONGD Agareso e financiadas pola Xunta de Galicia, resultaron 54 vídeos onde a rapazada identificaba un problema local ou global e explicaba que facer ao respecto. Entre todas as pezas convocouse o concurso #PeopleOfTheFuture.
Cómpre apuntar que o Concello da Guarda veu participando nos últimos tres anos no proxecto People & Planet a través dun dos catro Consellos Climáticos Xuvenís constituídos noutros tantos concellos socios do Fondo Galego de Cooperación e Solidariedade. A mocidade xa lle presentou aos representantes municipais as súas propostas, entre as que se inclúen sensibilizar fronte as especies invasoras e plantar árbores autóctonas para previr incendios, espazos urbanos máis verdes ou a organización dun festival sostible. Ademais, as recomendacións elaboradas pola mocidade a nivel autonómico expuxéronse o pasado mércores na Asemblea Xeral do Fondo Galego.