O presidente do Fondo Galego de Cooperación e Solidariedade e alcalde de Nigrán, Juan González, áchase esta semana na cidade brasileira de Curitiba, referente da urbanización sustentable, para intercambiar boas prácticas municipais arredor da mobilidade sostible. A Confederación de Fondos de Cooperación y Solidaridad, na que o Fondo Galego exerce a Viceperesidencia, coorganiza este encontro internacional no marco do proxecto europeo #AcessoCidades, canda entidades de Italia e Brasil. A cita encádrase asemade na Smart City Expo, o evento máis importante relacionado coas cidades intelixentes a nivel mundial, que prevé atraer unhas 15.000 persoas.
A axenda, que deu comezo o pasado martes con visitas a diferentes experiencias locais, centrouse onte no Foro Nacional de Secretarios e Xestores de Mobilidade Urbana, onde Juan González presentou distintas estratexias para reducir as mortes e lesións por accidentes de tráfico. “O espazo público debe considerarse un dereito cidadá, polo que ha de ser cada vez máis accesible para peóns e ciclistas, tendo en conta a infancia, as persoas maiores, con discapacidade, etc.”, explicou. A isto contribúen programas como ‘Cidades que camiñan’ e ‘Cidade 30’, en referencia ao límite de velocidade, pois “debemos loitar contra a violencia viaria e facilitar a convivencia harmónica entre veciñanza e vehículos”, indicou o rexedor.
A comitiva do proxecto #AcessoCidades, na que o Fondo Galego é a única entidade do Estado Español xunto coa Área Metropolitana de Barcelona, asistirá hoxe á Reunión Xeral da Frente Nacional de Prefeitos, na que están chamados a participar os máis de 400 alcaldes e alcaldesas das principais cidades do Brasil. Xa mañá, Juan González exporá ante a audiencia da Smart City Expo iniciativas municipais como unha aplicación para atopar aparcamento, a instalación de electrolineiras para fomentar o vehículo eléctrico ou os paneis “metrominuto” que incentivan o desprazamento a pé. Tamén outras accións previstas no Plan de Mobilidade Sostible do Concello de Nigrán, como a conexión das parroquias mediante un microbús eléctrico ou medidas para incentivar o uso da bicicleta.
#AcessoCidades
O proxecto #AcessoCidades propón repensar as políticas públicas de mobilidade urbana en clave de desenvolvemento sostible e redución das desigualdades, tal e como establece a Axenda 2030. Para acadar este obxectivo, promove o intercambio de experiencias entre municipios e a formación no emprego de datos abertos para planificar os sistemas de transporte, cunha visión democrática e participativa, baseada nos dereitos da cidadanía. O Frente Nacional de Prefeitos (FNP), a Associazione Nazionale Comuni Italiani e a Confederación de Fondos de Cooperación y Solidaridad promoven esta iniciativa, cofinanciada pola Unión Europea.