O Fondo Galego de Cooperación e Solidariedade comparte entre onte e hoxe en Holanda a súa experiencia no eido da educación para o desenvolvemento con entidades neerlandesas, alemás e portuguesas. O intercambio de boas prácticas encádrase na segunda fase do proxecto europeo Redes para o Desenvolvemento.
Baixo o epígrafe ‘Aprendizaxe global para unha efectiva cooperación ao desenvolvemento’, as actividades deron comezo onte no Concello de Amsterdam, onde o Consello Nacional para Parcerías das Cidades entre Países Baixos e Nicaragua (LBSNN) presentou o seu traballo. Xa pola tarde, a comitiva trasladouse ao veciño municipio de Helmond co fin de coñecer as iniciativas de educación para a cidadanía global que se levan a cabo nunha escola, na que tiveron a oportunidade de entrevistarse con estudantes e profesorado.
Na xornada de hoxe mércores, debaterase sobre as metodoloxías e materiais empregados polos distintos socios do proxecto europeo: o Instituto Marquês de Valle Flôr (Portugal), Fine+p (Alemaña), LBSNN (Holanda) e o propio Fondo Galego. O secretario da asociación municipalista, Daniel González Palau, explicará como os concellos conciencian contra as desigualdades a través de contacontos, obradoiros, cine, exposicións ou unidades didácticas.
Avalado pola UE
O Fondo Galego ofreceu o seu asesoramento para promover redes de cooperación descentralizada durante a primeira fase de Redes para o Desenvolvemento, que culminou coa creación da Rede Intermunicipal de Cooperaçao ao Desenvolvemento en Portugal e a xeración en Alemaña dun tecido de municipios irmandados con localidades nicaraguanas. No período 2014-2017, volve achegar a súa experiencia a entidades tanto destes dous países como de Holanda, desta volta co obxectivo de fortalecer as autoridades locais europeas en accións de educación para o desenvolvemento e para a cidadanía global.
As metas específicas pasan por capacitar as autoridades locais en accións de educación para o desenvolvemento, promover boas prácticas e parcerías multiactor europeas e incorporar a participación da cidadanía nas políticas de cooperación. No marco do proxecto cofinanciado pola UE, o Fondo Galego presentará o seu modelo de cooperación municipalista en rede a través de obradoiros de traballo nos distintos países implicados.