Persoal da radio salvadoreña apoiada polo Fondo e Agareso visita Pontevedra e Redondela

Persoal da radio salvadoreña apoiada polo Fondo e Agareso visita Pontevedra e Redondela

Persoal da radio salvadoreña apoiada polo Fondo e Agareso visita Pontevedra e Redondela 1199 705 Fondo Galego de Cooperación e Solidariedade

Dúas reporteiras e un reporteiro dunha emisora comunitaria de El Salvador deron a coñecer este luns en centros educativos de Redondela e Pontevedra o proxecto financiado polo Fondo Galego de Cooperación e Solidariedade, do que ambos os dous concellos forman parte, á Asociación Galega de Reporteiros Solidarios (Agareso). A través desta iniciativa trabállase con alumnado da rexión salvadoreña do Bajo Lempa e cos comités de protección civil para previr e reducir a vulnerabilidade perante o risco de inundacións nos municipios de Tecoluca e Zacatecoluca, amplificando os resultados das formacións e a capacidade de reacción da poboación a través de Radio Tehuacán.

Yasmin Pineda, directora da emisora, xunto con José Manuel Rodríguez, encargado de programación, e Iris Mijango, unha das voluntarias máis activas, conversaron con alumnado do 1º curso de Secundaria no IES Mendiño de Redondela, concello que exerce a Presidencia do Fondo Galego. Logo desprazáronse a Pontevedra para intervir no IES Frei Martín Sarmiento, diante de 120 estudantes de 3º e 4º da ESO.

Alumnado de Redondela achegouse de primeira man á participación comunitaria en El Salvador.

A comitiva de El Salvador achegoulles ás rapazas e rapaces a realidade centroamericana, concienciándoos sobre a importancia da participación comunitaria e de ter un discurso propio sobre as problemáticas que afectan á nosa contorna.

No marco do proxecto promovido por Agareso e o Fondo Galego, en colaboración coa ONGD local Cordes, estanse a desenvolver nestes intres en El Salvador diversos obradoiros de sensibilización ambiental, que levan aparellada a entrega de materiais de prevención. Ao tempo, cada semana emítese en Radio Tehuacán o espazo 'En contacto coa natureza' para concienciar sobre a necesidade de respectar o medio para evitar as graves consecuencias das catástrofes naturais que cada ano afectan a zona.

 
    Este sitio web almacena cookies no seu computador. Estas cookies utilízanse para recompilar información sobre como interactúa co noso sitio web e permítenos lembralo. Utilizamos esta información para mellorar e personalizar a súa experiencia de navegación e para obter estatísticas e métricas sobre os nosos visitantes tanto neste sitio web como noutros medios. Para obter máis información sobre as cookies que utilizamos, pomos a disposición a nosa Política de cookies.
    Máis información