Representantes de todos os grupos parlamentarios participaron esta mañá no Almorzo Xusto organizado polo Fondo Galego de Cooperación e Solidariedade no Pazo do Hórreo, onde se comprometeron a alentar ás candidaturas municipais dos seus partidos a incorporar nos programas electorais a adhesión dos concellos a esta rede e a promover a cooperación internacional desde o local. Os grupos estudarán ademais a posibilidade de realizar unha declaración institucional ao respecto no Parlamento de Galicia, a proposta do deputado do PPdeG Alberto Pazos Couñago.
O parlamentario expuxo ademais que a creación do Fondo Galego en 1997 “supuxo un salto da caridade á cooperación real” e que hoxe en día constitúe “unha ferramenta fundamental”. O voceiro do Grupo Parlamentario dos Socialistas de Galicia, Xoaquín Fernández Leiceaga, apostou pola súa parte por “facer un maior esforzo de accountability” para que o labor realizado a prol do desenvolvemento dos países empobrecidos chegue á cidadanía, unha visibilización pola que tamén avogou a representante de En Marea, Paula Quinteiro, para quen “hai que socializar o impacto e o enfoque” do traballo que se está a levar a cabo. Ao tempo, o deputado do BNG Luís Bará engadiu a necesidade de coordinarse e “reflexionar sobre o tipo de cooperación e de relacións que se establecen”, descartando o paternalismo.
O presidente do Fondo Galego e alcalde de Nigrán, Juan González, abriu a xuntanza salientando que a incorporación dos concellos a esta entidade lles “dá a oportunidade de participar na cooperación para o desenvolvemento, establecendo relacións de aprendizaxe mutua” cos países do Sur. Unha idea na que afondou o vogal da Comisión Executiva e concelleiro en Cartelle, Daniel Fernández, que sinalou a vantaxe que supón para os concellos pequenos, ao realizar “unha pequena achega que sobre o terreo significa moito“.
A tamén vogal e vicepresidenta da Deputación da Coruña, Goretti Sanmartín, lembrou “a importancia da sensibilización fronte as desigualdades” que fan os concellos a través das actividades facilitadas polo Fondo Galego de Cooperación e Solidariedade, como administracións máis próximas á cidadanía. Mentres que a vogal e edil na Coruña, Rocío Fraga, remarcou o valor da asociación municipalista cmo “espazo de traballo conxunto das distintas forzas para acadar un obxectivo común”. Por último, a vicepresidenta e concelleira en Redondela, Teresa París, referiuse ao actual marco normativo, apostando por flexibilizalo para que non se poñan trabas ás políticas públicas municipais de cooperación internacional. O almorzo servido foi a base de produtos de comercio xusto da ONGD Panxea.