O programa Especialistas en Cooperar enviará a Mozambique a persoal da administración local

O programa Especialistas en Cooperar enviará a Mozambique a persoal da administración local

O programa Especialistas en Cooperar enviará a Mozambique a persoal da administración local 2560 2560 Fondo Galego de Cooperación e Solidariedade

O Fondo Galego de Cooperación e Solidariedade vén de lanzar o novo programa Especialistas en Cooperar, que permitirá a tres técnicas e técnicos da administración local colaborar cos municipios e entidades parceiras da entidade en Mozambique. As estancias prolongaranse durante un máximo de trinta días e as persoas seleccionadas poderán viaxar en réxime de voluntariado, empregando as súas vacacións, ou ben solicitando unha licenza específica ao abeiro da lexislación autonómica.

A cooperación técnica é unha das ferramentas máis potentes e distintivas da cooperación internacional ao desenvolvemento impulsada polos gobernos locais, pois supón aproveitar o know how dos municipios para reforzar as capacidades das administracións públicas e asociacións das sociedades máis desfavorecidas, facilitando respostas profesionais e formación adecuada ás súas necesidades. Ese é precisamente o principal obxectivo de Especialistas en Cooperar, que tamén favorece o intercambio de experiencias e un maior coñecemento da realidade dos países que o Fondo Galego está a apoiar.

Neste senso, as prazas ofertadas vincúlanse aos dous proxectos que na actualidade se están a executar en Mozambique. Dunha banda, a Fundação Encontro precisa dunha persoa experta en igualdade de xénero para a iniciativa está a promover o dereito á educación e á saúda das nenas e nenos do rural, co financiamento do Concello de Cambre. A súa tarefa consistirá en realizar unha análise de xénero nos centros infantís e actividades coeducativas.

Por outra parte, a Asociación Nacional de Municipios de Mozambique (ANAMM), recibirá apoio para o proxecto de construción de catro vivendas resilientes fronte ao cambio climático, cofinanciado pola Xunta de Galicia. Deste xeito, búscase unha arquitecta ou arquitecto municipal que asesore e supervise a intervención, así como unha técnica ou técnico da área social que oriente a atención prestada polo concello de Boane ás persoas afectadas polo ciclón  Eloíse, entre as que se atopan as beneficiarias das novas casas.

Empregadas e empregados das deputacións, concellos e mancomunidades de Galicia teñen ata o 13 de abril para solicitar a súa participación no programa Especialistas en Cooperar, financiado pola Axencia Española de Cooperación Internacional ao Desenvolvemento (AECID), que cubre todos os gastos derivados do desprazamento e a estadía. As candidaturas presentaranse enviando a ficha de solicitude ao enderezo electrónico info@fondogalego.gal, canda o currículo, unha carta de motivación e demais documentación requirida nas bases. Alén da formación e a experiencia, valorarase a vinculación co eido da cooperación e do desenvolvemento sostible. Asemade, terán preferencia as persoas que traballen nunha deputación ou concello socio do Fondo Galego.

Especialistas en Cooperar toma o relevo do anterior programa de voluntariado internacional para persoal municipal, Vacacións con Traballo, que ao longo de catorce edicións enviou a un total de 46 empregadas e empregados da administración local a colaborar cos parceiros do Fondo Galego de Cooperación e Solidariedade en Nicaragua, Cuba, Perú, Mozambique e Cabo Verde, contribuíndo así á mellora da calidade de vida da poboación e xerando fluxos de coñecemento compartido. A reconfigración do programa, tras dous anos suspendido por mor da pandemia, busca agora potenciar a súa dimensión de cooperación técnica no marco da Axenda 2030 e dos Obxectivos de Desenvolvemento Sostible.

Bases EeC 2022
Ficha de solicitude
Modelo carta concellos socios
Modelo carta concellos non socios

    Este sitio web almacena cookies no seu computador. Estas cookies utilízanse para recompilar información sobre como interactúa co noso sitio web e permítenos lembralo. Utilizamos esta información para mellorar e personalizar a súa experiencia de navegación e para obter estatísticas e métricas sobre os nosos visitantes tanto neste sitio web como noutros medios. Para obter máis información sobre as cookies que utilizamos, pomos a disposición a nosa Política de cookies.
    Máis información