O Fondo Galego de Cooperación e Solidariedade pechará o xoves 10 de outubro o mandato 2015-2019 e abrirá o novo ciclo 2019-2023 cunha Asemblea Xeral na que se someterá a aprobación a composición da nova Comisión Executiva, proposta pola saínte. Representantes dos 97 concellos e das tres deputacións socias da entidade están chamados a participar na xuntanza que se celebrará na Cidade da Cultura en Santiago de Compostela, concretamente no Auditorio 2 edificio CINC, ás 10.30 horas en primeira convocatoria e ás 11 horas en segunda.
A sesión dará comezo co balance dos últimos catro anos, nos que a Presidencia do Fondo Galego lle correspondeu ao Concello de Nigrán, a Vicepresidencia a Redondela e a Tesourería a Pontevedra, mentres que a Secretaría continuou exercéndoa o Instituto Galego de Análise e Documentación Internacional (IGADI), impulsor da iniciativa nos anos 90. As vogalías correspondían ata o momento aos concellos da Coruña, Cartelle, Monforte de Lemos, Oleiros e á Deputación da Coruña, buscando sempre a creación dun espazo transpartidario e mantendo o equilibrio entre provincias, municipios grandes e pequenos, da costa e do interior, etc.
As políticas e políticos designados como enlace co Fondo Galego en cada unha das administracións locais e provinciais socias están convocados á Asemblea, aínda que poden delegar noutra ou noutro representante político ou técnico. Prégase confirmación ou escusa da asistencia ata o 8 de outubro no electrónico acorzo@igadi.org ou nos teléfonos 986 843 436 e 698 144 536. No entanto, ao tratarse dunha xuntanza clave, a participación é especialmente relevante nesta ocasión.
Lémbrase asemade a aqueles concellos socios que aínda non comunicaron as designacións oficiais das súas ou dos seus representantes tras a configuración das novas corporacións, que o fagan á maior brevidade posible, pois o seu compromiso é fundamental para incorporar a defensa dos Dereitos Humanos na axenda local.