Illa de San Simón, 26 de outubro de 2011. O Fondo Galego de Cooperación e Solidariedade e mais os Concellos da Coruña, Vigo e Pontevedra, socios da entidade municipalista, apoian a rehabilitación de vivendas na localidade caboverdiana de Eito. O proxecto contempla a construción de baños e cociñas, reparación de fachadas, drenaxe de augas, empedrado das rúas e recuperación de espazos verdes, ademais dunha campaña de sensibilización ambiental.
A través do Fondo Galego, que destina 2.000 euros á iniciativa, o Concello da Coruña achega 20.000 euros, mentres que o Concello de Vigo contribúe con 15.000 e o de Pontevedra con 11.000 euros. As beneficiarias directas son 17 familias extremadamente pobres do lugar de Lombo Comprido, oito delas cunha muller á fronte, aínda que toda a veciñanza de Eito gozará dunha contorna máis saudable. As persoas beneficiarias participan na execución dos traballos, baixo a dirección de técnicos da Cámara Municipal de Paúl.
As casas inacabadas e con apenas dous cuartos para familias que adoitan ser numerosas facilitan a aparición de enfermidades e dos problemas de promiscuidade, amais da vulneración da intimidade, nomeadamente das mulleres. Do mesmo xeito, conlevan a acumulación nas rúas de augas residuais, lixos e excretas, favorecendo a aparición de insectos que difunden enfermidades. A instalación de pozos negros ou a canalización das augas sucias e pluviais contribuirán a mellorar a saúde pública.
Ao mesmo tempo, realizaranse con toda a comunidade actividades de sensibilización sobre cuestións hixienico-sanitarias e medioambientais, co fin de reducir á metade a incidencia de enfermidades infectocontaxiosas no prazo dun ano. A mellora do contorno repercutirá asemade sobre a autoestima das e os residentes e animará ás donas á emprender nas súas casas rehabilitadas pequenos negocios de costura ou de elaboración de doces e salgados.
Este proxecto, ademais de entroncar cos Obxectivos do Milenio e coa Declaración dos Dereitos Humanos, enmárcase no Plan de Igualdade e Equidade de Xénero implantado pola Cámara Municipal de Paúl co cofinanciamento do Fondo Galego de Cooperación. A intervención acada este ano a súa segunda fase, despois de que en 2010 se levara a cabo a primeira coa colaboración do Concello de Vigo.