Coincidindo co Día Mundial da Saúde, un tema sempre fundamental pero aínda máis neste último ano de pandemia, o Fondo Galego de Cooperación e Solidariedade celebrará o mércores 7 de abril, ás 10 horas, a Asemblea Xeral de entidades socias. A xuntanza realizarase a través de videoconferencia e nela están chamadas a participar as persoas representantes dos 98 concellos e as tres deputacións que forman parte da nosa rede.
A orde do día inclúe cuestións tan relevantes como a resolución da convocatoria de axudas a ONGD para proxectos de cooperación ao desenvolvemento, dotada con 100.000 euros. Recibíronse doce propostas centradas en dez países de Latinoamérica e África, destacando Nicaragua e Guinea-Bissau, mentres que os principais sectores de actuación foron auga e saneamento e mais medio ambiente. A comisión avaliadora dos proxectos estivo conformada por persoal técnico dos concellos da Guarda, Burela, Cabanas, Guitiriz, Viana do Bolo e do propio Fondo Galego de Cooperación e Solidariedade. Así mesmo, as técnicas fixeron achegas para o protocolo de funcionamento da propia comisión, que tamén deberá ser ratificado na Asemblea.
No encontro toca, asemade, facer balance do pasado exercicio, presentando tanto as contas como a memoria, que vén de ser publicada cun novedoso formato. Do mesmo xeito, someterase a aprobación o Plan de Actividades e mais o orzamento para 2021. Levaranse tamén ante os socios as instrucións de contratación que rexerán a partir de agora no Fondo Galego, previamente supervisadas pola asesoría xurídica, así como a solicitude de declaración de utilidade pública. Ademais, está previsto ratificar as novas altas e os leves cambios na configuración da Comisión Executiva.