O Fondo Galego de Cooperación e Solidariedade contribuirá a mellorar a alimentación de 186 nenas e nenos do municipio guatemalteco de Jocotán mediante a instalación de hortas en tres centros de Primaria. A asociación de concellos e deputacións financia con 15.000 euros este proxecto impulsado por Solidariedade Internacional de Galicia, que implicará a alumnado, docentes e familias indíxenas na produción agroecolóxica para acadar menús escolares máis nutritivos e saudables.
En Jocotán, a taxa de pobreza chega ao 82% e a desnutrición crónica afecta ao 67% da poboación. Ademais, o municipio localízase no Corredor Seco Centroamericano, afectado por fenómenos climáticos extremos como secas prolongadas e graves inundacións. O proxecto, que ten á asociación Mejorha como socio sobre o terreo, estase a desenvolver nas comunidades de Tierra Blanca, Plan Candelero e El Nanzal, pertencentes á etnia maia ch’orti’. Trátase pois dun contexto de alta vulnerabilidade, no que é preciso garantir a seguridade alimentaria e impulsar o desenvolvemento rural.
Para isto, alén de mercar sementes, abonos e ferramentas, estanse a levar a cabo obradoiros teórico-prácticos sobre horticultura, especies autóctonas ou hixiene alimentaria e preparación de receitas nutritivas. Estas formacións permitirán mellorar os coñecementos do profesorado, das familias e das persoas voluntarias que se encargan de preparar os menús escolares, para o que terán máis hortalizas, herbas e froitas dispoñibles. Ao tempo, as e os estudantes verán reforzados os contidos da materia de Ciencias Naturais.