O Fondo Galego de Cooperación e Solidariedade votou esta mañá a favor do IV Plan Director da Cooperación Galega, amosando no entanto as súas reticencias a respecto do que considera falta de compromiso orzamentario e inxerencia da Xunta de Galicia na autonomía local. O documento, que si recolle outras alegacións formuladas pola asociación de concellos e deputacións, foi presentado polo director xeral de Relacións Exteriores e coa Unión Europea, Jesús Gamallo, na xuntanza do Consello Galego de Cooperación para o Desenvolvemento, que reúne aos axentes do sector.
A pesar de que a planificación para o período 2018-2021 contempla melloras substanciais, o seu alcance deberá concretarse ano tras ano nos plans anuais. En calquera caso, as achegas recollidas son insuficientes, pois quedan fóra cuestións chave para o Fondo Galego, como é a de equiparar o convenio coa administración autonómica que na actualidade se sitúa nos 40.000 euros ao doutras entidades, xa que un posible aumento desta contía se supeditará aos posibles avances orzamentarios. A Xunta tampouco retomará o financiamento directo de proxectos de cooperación internacional co Fondo Galego, se ben se abre a posibles parcerías.
Outra das demandas que a Dirección Xeral desestimou foi a solicitude de que se retire a obligatoriedade de obter un informe favorable por parte da administración autonómica para as actuacións que o Fondo Galego e mais as deputacións e concellos leven a cabo no eido da cooperación ao desenvolvemento, o que se considera unha vulneración da autonomía das entidades locais. Rexeitouse asemade abrir liñas de subvencións para a contratación de persoal especializado e para dotar de contido os irmandamentos con municipios do Sur.
No entanto, o IV Plan Director da Cooperación Galega enriqueceuse con suxestións realizadas polo Fondo Galego, como a de aproveitar as nosas vantaxes comparativas potenciando a colaboración con países lusófonos –aínda que non todos-, a de reforzar o traballo conxunto dentro da Eurorrexión Galicia-Norte de Portugal ou a de a de incorporar a formación en cooperación internacional aos programas da Escola Galega de Administración Pública. Ademais, facilitarase o asesoramento técnico por parte de funcionariado autonómico a parceiros do Fondo Galego en países empobrecidos, ao tempo que os centros formativos da Xunta se porían a disposición para o fortalecemento institucional de municipios do Sur. A planificación 2018-2021 aposta ademais polo aliñamento cos Obxectivos de Desenvolvemento Sostible (ODS) fixados por Nacións Unidas e pola xeración de sinerxías entre os distintos actores.