O Fondo Galego arrinca o novo ano con cen concellos e deputacións socias

O Fondo Galego arrinca o novo ano con cen concellos e deputacións socias

O Fondo Galego arrinca o novo ano con cen concellos e deputacións socias 1500 1035 Fondo Galego de Cooperación e Solidariedade

O Fondo Galego de Cooperación e Solidariedade inicia 2019 cun cento de administracións locais e provinciais socias, logo de sumar no último ano as altas de Muros, Cariño, Guitiriz, Viana do Bolo, As Neves e Bueu. Achegando unha cota anual proporcional á súa poboación, os concellos e deputacións que fan parte desta rede contribúen ao impulso de proxectos de desenvolvemento en países do Sur e á concienciación da súa veciñanza fronte as desigualdades.

En 2018, uns setenta municipios acolleron algunha das actividades de sensibilización a prol dos Dereitos Humanos ofertadas polo Fondo Galego, que van desde teatro e obradoiros ata exposicións e concertos. Outras realidades, a loita contra a pobreza e a exclusión, a equidade de xénero ou as persoas migrantes e refuxiadas son algunhas das temáticas que se abordaron a través destas accións, que chegaron a milleiros de persoas.

En canto aos proxectos de cooperación internacional, Fondo Galego deulle continuidade ás dúas iniciativas impulsadas en Mozambique, unha para previr doenzas e adiccións na mocidade a través do deporte e outra para garantir o abastecemento de auga nun municipio rural. Ademais, está a apoiar a ONGD galegas en Guatemala, Honduras e Guinea-Bissau, alén de participar nunha proposta europea para consolidar o proceso de paz en Colombia.

O Fondo Galego de Cooperación continuará promovendo estas e outras accións ao longo do novo ano, no que tocará renovar a Comisión Executiva tras as eleccións municipais. No entanto, a planificación estratéxica seguirá encamiñada cara a consecución dos Obxectivos de Desenvolvemento Sostible fixados pola ONU. Neste senso, 2019 empezará xa con forza, pois en xaneiro o presidente do Fondo Galego e alcalde de Nigrán, Juan González, participará no II Congreso Internacional Think Europe 2030, en calidade de presidente da Confederación de Fondos a nivel estatal.

Ademais, entre os días 21 e 24 celebraranse nas catro capitais de provincia as xuntanzas da Rede Municipalista Solidaria, integrada por persoal técnico de cada unha das administracións locais socias. As xuntanzas contarán coa participación de responsables do proxecto con InteRed para promover unha educación integral en sexualidade en centros educativos guatemaltecos.

    Este sitio web almacena cookies no seu computador. Estas cookies utilízanse para recompilar información sobre como interactúa co noso sitio web e permítenos lembralo. Utilizamos esta información para mellorar e personalizar a súa experiencia de navegación e para obter estatísticas e métricas sobre os nosos visitantes tanto neste sitio web como noutros medios. Para obter máis información sobre as cookies que utilizamos, pomos a disposición a nosa Política de cookies.
    Máis información