O 85% da xente nova considera que o cambio climático afecta a súa vida diaria

O 85% da xente nova considera que o cambio climático afecta a súa vida diaria

O 85% da xente nova considera que o cambio climático afecta a súa vida diaria 2160 2160 Fondo Galego de Cooperación e Solidariedade

Tres de cada catro mozas e mozos europeos consideran que o cambio climático afecta a súa vida diaria e a súa saúde, segundo se desprende da sondaxe realizada no marco da iniciativa People & Planet cuxos resultados se dan a coñecer coincidindo co Día Mundial da Conservación da Natureza. A porcentaxe elévase ata o 85% en España, onde a grande maioría das persoas enquisadas eran galegas, ao ser o Fondo Galego de Cooperación e Solidariedade o único socio do proxecto en todo o Estado.

A nosa mocidade estima que os problemas ambientais con maior impacto na súa vida persoal son os incendios forestais (74%), a contaminación do aire (63%) e a seca (58%), mentres que o desxeo dos glaciares ou a subida do nivel do mar aprécianse como menos prexudiciais. Os lumes e a falta de auga son percibidos tamén como as cuestións medioambientais que máis afectan ao país en xeral, xunto coa perda de biodiversidade. O 93% da xente nova é consciente ademais de que a emerxencia climática ten a súa orixe na actividade humana. “Gustaríame atopar o xeito de unir á xente na procura do ben común, aínda que ás veces sexa difícil. Se é o correcto, hai que facelo”, sostiña unha das respostas recibidas.

No referente ás accións individuais para favorecer a sustentabilidade, en boa medida fan referencia ao aforro de auga, xa que o 83% das mozas e mozos pechan a billa mentres lavan os dentes e o 78% opta por ducharse no canto de tomar un baño. Ademais, o 61% sempre recicla e o 32% ás veces. No outro extremo atopamos que só o 8% participa habitualmente en campañas ambientais ou que un 11% merca produtos de comercio xusto. “Se só existe a opción de consumir produtos envoltos nun plástico que precisou litros de auga para ser producido, cómpre preguntarse a quen beneficia iso. A culpa non é só do cidadán de a pé que non recicla ese plástico”, consideraba outra das persoas enquisadas.

Con todo, no noso país son significativos os niveis de participación en accións públicas vinculadas ao tema do clima, especialmente a través de publicacións nas redes sociais (59%), votando nas eleccións (56%) e participando en folgas ou manifestacións (56%). Chama asemade a atención que case as tres cuartas partes das persoas enquisadas adoiten debater coa familia e amizades sobre o quecemento global, a escaseza de auga potable ou a auga como Dereito Humano. Discútese menos sobre o emprego deste recurso na agricultura e sobre a pegada da “auga invisible”, aquela que se consume na produción das nosas roupas, alimentos, dispositivos, etc.

O cuestionario preguntaba tamén sobre os temas que espertan máis consenso entre a xente nova á hora de unirse a campañas de incidencia política, nos que o cambio climático se sitúa á cabeza (74%), seguido pola discriminación de calquera tipo (72%), o acceso á educación (71%) e aos servizos de saúde e benestar (64%). Neste senso, apréciase unha ligazón entre o compromiso social e medioambiental. “As accións que realizo na casa non teñen o mesmo impacto que as que pode desenvolver un goberno, pero eu podo entender cales son as consecuencias das miñas decisións como consumidora, do que como, do que merco e como reducilo ou compensalo”, engadía unha das participantes.

O estudo revela, por outra banda, que o 60% das persoas que contestaron coñecen políticas ou iniciativas globais para mitigar o cambio climático, mentres que a porcentaxe cae ata o 43% no caso de políticas estatais. Tamén consideran que os organismos internacionais e as asociacións ecoloxistas son as mellor preparadas para afrontar esta tarefa. Do mesmo xeito, perciben que a educación (67%) e a mellor vía para implicar á mocidade nesta loita. En canto ao que poden facer os gobernos locais para impulsar as iniciativas da xente nova a prol da sustentabilidade, un 75% aposta polo apoio económico e un 59% reclama tamén instalacións para os seus encontros e actividades. “Cada concello podería organizar reunións mensuais coas asociacións xuvenís para debater sobre os principais problemas na zona e atopar solucións compartidas”, salientan algúns.

4000 respostas en 8 países

A enquisa ‘Mocidade europea e cambio climático: unha liña de base comunitaria’ desenvolveuse o ano pasado nos oito estados membros da Unión Europea que participan no proxecto People and Planet e na campaña Water of the Future: España, Portugal, Alemaña, Irlanda, Italia, Polonia, Romanía e Países Baixos. Preto de 4.000 cidadás e cidadáns, a grande maioría de entre 15 e 34 anos, expresaron a través dun formulario as súas inquedanzas arredor dos problemas ambientais e os novos hábitos sostibles. No Estado español reuníronse 730 respostas, case todas de Galicia e o 64% de mulleres, cunha destacada participación de estudantes menores de idade. A análise dos resultados permitirá orientar as accións do programa People and Planet, financiado polo programa DEAR da Comisión Europea, que apoia ás mozas e mozos para que se convertan en axentes de transformación na procura dun mundo máis sustentable, en sintonía co ODS 13.

Resultados da enquisa (inglés)

    Este sitio web almacena cookies no seu computador. Estas cookies utilízanse para recompilar información sobre como interactúa co noso sitio web e permítenos lembralo. Utilizamos esta información para mellorar e personalizar a súa experiencia de navegación e para obter estatísticas e métricas sobre os nosos visitantes tanto neste sitio web como noutros medios. Para obter máis información sobre as cookies que utilizamos, pomos a disposición a nosa Política de cookies.
    Máis información