O rianxeiro Novenoel e a ferrolá Eva Seoane veñen de gañar o I Concurso de murais arredor dos Obxectivos de Desenvolvemento Sostible 'Muros que unen', organizado polo Fondo Galego de Cooperación e Solidariedade co financiamento do Concello da Coruña. Así o decidiron na xuntanza mantida esta semana na cidade os membros do xurado, integrado polos artistas Mon Devane, Brais Rodríguez e Jano Viñuela, canda unha representante do Fondo Galego e outro do Concello. Ao certame presentáronse 18 muralistas, dos que 11 eran mulleres, e un total de 21 obras.
A proposta 'Ningures' de Novenoel, resultou seleccionada para representar o ODS1: Pórlle fin a pobreza en todas as súas formas en todo o mundo, e reproducirase no viaduto da avenida de Oza sobre a rúa Posse, preto dun dos principais eixos de consumo da cidade. O xurado valorou tanto a execución técnica como a orixinal reinterpretación postapocalíptica do tema, que nos presenta un camiñante ollando cara a cidade industrializada dende o alto dun outeiro, mergullado nunha paisaxe entre desoladora e futurista. O autor chama a reflexionar sobe o hiperconsumismo, ao tempo que anima a compartir e a apostar pola transformación, nunha loita que debe ser común.
Eva Seoane foi a escollida para representar o ODS5: Lograr a igualdade entre os xéneros e empoderar a todas as mulleres e nenas, pola obra 'O lavadoiro de Falperra', que se realizará no muro de contención das escaleiras que ascenden a este lugar desde a rolda de Nelle. Neste caso, o xurado tivo en conta que cun trazo simple e cores básicas, a mensaxe da dignificación do traballo feminino chega de xeito directo, ao representar un dos principais oficios que se exercían antano na zona: o das lavandeiras. A obra conecta así coa historia do barrio, co sentido de pertenza e reivindicación dun pasado, un presente e un futuro no que as mulleres contan. O bosquexo recupera mesmo algún elemento arquitectónico e paisaxístico xa extinguidos, poñendo en valor a memoria do lugar e o traballo de tantas mulleres anónimas que non adoita ser recoñecido.
A través destes dous murais, premiados con 2.000 euros cada un e que se executarán previsiblemente a finais de outubro, preténdese comezar a difundir a través da arte urbana os 17 Obxectivos de Desenvolvemento Sostible fixados polos Estados membros da ONU a finais de 2015 para erradicar a pobreza, protexer o planeta e asegurar a prosperidade para todas as persoas no horizonte de 2030. Co fin de fomentar ademais o pensamento crítico e a participación cidadá na construción de cidades inclusivas, a primeira edición de 'Muros que unen' encádrase no convenio asinado entre o Fondo Galego e o Concello da Coruña, que destina deste xeito 20.000 euros á realización de actividades de sensibilización fronte as desigualdades.