Estréase un novidoso espectáculo teatral polo Día Mundial das Persoas Refuxiadas

Estréase un novidoso espectáculo teatral polo Día Mundial das Persoas Refuxiadas

Estréase un novidoso espectáculo teatral polo Día Mundial das Persoas Refuxiadas 1199 799 Fondo Galego de Cooperación e Solidariedade

Promover a reflexión sobre as fronteiras e a situación das persoas refuxiadas é o obxectivo do novo espectáculo teatral creado por Pallasos en Rebeldía para o Fondo Galego de Cooperación e Solidariedade. A peza 'O valo' estrearase en Poio na semana en que se conmemora o Día Mundial das Persoas Refuxiadas, fixado pola ONU no 21 de xuño. A representación terá lugar concretamente o mércores 21, ás 11 horas, no CEIP de Lourido. A proposta percorrerá en total dez concellos socios do Fondo Galego co fin de evitar o esquecemento das guerras e da xente que delas foxe, ao tempo que se convida a transformar a realidade pensando un mundo diferente.

O actor Fran Rei e a actriz Saleta Fernández, baixo a dirección de Iván Prado, interveñen no espectáculo 'O valo', baseado no texto homónimo que lle valeu a Carlos Labraña o Premio Manuel María de Literatura Dramática Infantil. A proposta representa o encontro entre unha nena que escapa da guerra e un rapaz soldado, gardián devoto de fronteiras móbiles. Cómpre ter en conta que o conflito en Siria obrigou a máis de cinco millóns de persoas a abandonar o país na procura de refuxio noutros lugares, entre as que se achan moitas menores. 'O valo' é unha obra escrita en homenaxe a todas elas, para que as teñamos presentes e as súas vidas constitúan o xerme da loita contra todos os valados, muros e fronteiras que separan os seres humanos.

Poio, Laxe, Redondela, San Sadurniño, Ames, A Guarda, Caldas, Ourense, Cabanas e A Coruña son os municipios socios do Fondo Galego de Cooperación e Solidariedade que acollerán antes de finais de ano esta actuación, cofinanciada pola Xunta de Galicia. Pallasos en Rebeldía defínese coma un espazo do teatro galego para traballar a cooperación internacional a través da risa. Xurdida nunha visita a Chiapas en 2004, considera que o clown desenvolve unha función protectora de valores sociais como a crítica, o dereito a rir que tamén teñen as persoas máis desfavorecidas ou a superación dos nosos complexos mediante a cura da gargallada.

    Este sitio web almacena cookies no seu computador. Estas cookies utilízanse para recompilar información sobre como interactúa co noso sitio web e permítenos lembralo. Utilizamos esta información para mellorar e personalizar a súa experiencia de navegación e para obter estatísticas e métricas sobre os nosos visitantes tanto neste sitio web como noutros medios. Para obter máis información sobre as cookies que utilizamos, pomos a disposición a nosa Política de cookies.
    Máis información