Visibilizar os proxectos apoiados polo Fondo Galego de Cooperación e Solidariedade en materia de auga e saúde é o obxectivo das dúas novas exposicións financiadas polo Concello da Coruña que percorrerán as administracións locais socias en 2026. Búscase así poñer en valor a cooperación internacional impulsada polas deputacións e concellos na África lusófona, ao tempo que se fomenta a corresponsabilidade, a empatía e a convivencia intercultural.
A mostra ‘Saúde universal. Proxectos que dan vida’ amosa o impacto das actuacións implementadas nos últimos anos arredor do ODS 3. Desde o combate á Covid-19 en Guinea-Bissau ata a pobreza menstrual en Mozambique ou a hixiene en Cabo Verde, sen esquecer a saúde materno-infantil. Aos habituais textos e fotografías súmanse as ilustracións de Sandra Lodi -Premio Castelao de banda deseñada- e mais os testemuños que nos chegan desde terreo, aos que se pode acceder a través de códigos QR.
A exposición ‘Fontes de solidariedade. Auga que flúe de Galicia a África’ céntrase no ODS 6 e recolle as intervencións que permitiron dotar de auga potable as aldeas de Guinea-Bissau, fomentar a agricultura en Cabo Verde ou previr os ataques dos crocodilos en Mozambique. Sempre tendo en conta o enfoque de xénero e a plusvalía da cooperación técnica. Cun innovador e colorido deseño, a información gráfica e textual compleméntase con debuxos elaborados polo alumnado da escola construída na illa guineana de Pecixe.