O proxecto encamiñouse a mellorar a xestión dos recursos sanitarios e o acceso da poboación á rede primaria. Apoiouse a rehabilitación do centro de saúde de Río das Pedras e a construción dunha nova maternidade, completando as obras para optimizar as condicións de hixiene mediante a instalación, en cada un dos dous centros, dunha incineradora, unha foxa biolóxica e mais un peche perimetral. Tamén se realizou un diagnóstico das infraestruturas sanitarias da provincia a través de visitas a 116 unidades. A base de datos elaborada e o documento final destináronse á definición dun novo plan de investimento que permitiu priorizar as actuacións máis inmediatas. Asemade, o persoal técnico da Dirección Provincial de Saúde (DPS) recibiu formación no eido informático. Redactáronse tamén os proxectos para rehabilitar tres vivendas para a DPS e achegouse asesoramento técnico na visita a diferentes centros que se atopaban en obras, coma o hospital de Vilankulos.