Achegarse ao río para recoller auga constitúe unha práctica de risco para as comunidades que viven á beira do Zambeze, xa que se expoñen aos ataques de animais salvaxes, como hipopótamos e crocodilos, que están a causar mortes e graves feridas sobre todo ás mulleres, habitualmente encargadas de encher os bidóns e lavar a roupa. Así acontecía no barrio de Mutarara Velha, onde a través deste proxecto se construíron dous pozos con bombas solares para garantir un acceso seguro á auga potable, xa que en dous anos 26 persoas da aldea perderan a vida intentando abastecerse. Minguouse así a incidencia de doenzas como a diarrea, causa de mortalidade sobre todo entre nenos e nenas, ao tempo que se reduciu a distancia que as mulleres teñen que percorrer cargando as garrafas, de xeito que poderán dedicar o seu tempo a outras actividades. Elas son tamén as integrantes dos comités de xestión para manter e supervisar o funcionamento dos sistemas de abastecemento, para o que recibiron unha formación básica. Estímase en 1.200 o número de persoas beneficiadas con esta iniciativa.