Cooperación para a xustiza social

Cooperación para a xustiza social

Cooperación para a xustiza social 1199 799 Fondo Galego de Cooperación e Solidariedade

En dúas décadas de andaina, o Fondo Galego de Cooperación impulsou máis de 150 proxectos en preto de 30 países, entre os que destacan Cabo Verde, Nicaragua, Cuba e Perú. Igualdade de xénero, educación, saúde, auga e saneamento, vivenda, turismo sustentábel ou infraestruturas comunitarias son algunhas das áreas que vén apoiando a entidade, constituída por 91 concellos e tres deputacións que se comprometen coa solidariedade internacional desde o ámbito local. Para alén diso, ofreceu axuda de emerxencia ante conflitos bélicos e catástrofes naturais, como o terremoto en Haití ou o desprazamento de persoas refuxiadas. 

Os esforzos do Fondo Galego concéntranse hoxe na África lusófona máis empobrecida, nomeadamente en Mozambique. Alí estase a traballar directamente co municipio de Nhamayábue para garantir o acceso á auga no barrio de Mutarara Velha. Abriranse catro pozos para que a poboación non teña que percorrer o río a causa da seca, evitando así os ataques dos animais que o habitan, que xa provocaron mortes.

Por outra parte, coa Fundação Encontro estase a executar unha intervención co deporte como ferramenta para previr doenzas e adiccións entre a mocidade. Ofreceranse alternativas de lecer, creando equipos en que se incentivará a participación e o liderado das rapazas, ao tempo que se formará en educación para a saúde un grupo que promoverá hábitos de vida saudábeis.

A maioría das vilas galegas non poderían desenvolver pola súa conta este tipo de proxectos, que si son posíbeis se actuarmos como un colectivo que procura sinerxías e une efectivos. Trátase de posuír un espazo de debate e encontro e de aforrar custos por partillar actividades e experiencias.

Confiamos en que a igualdade sexa un dos eixes da cooperación para construír un mundo máis xusto, sen dominacións, con oportunidades para todas as persoas. E este obxectivo temos que cumprilo desde a nosa condición de persoas dun país que padeceu represión e achou acollemento noutros países, que sufriu pobreza e tivo que emigrar e que, por tanto, entende os pobos cos que coopera e estabelece unha relación en pé de igualdade.

Facer política internacional significa apoiar os proxectos das organizacións que traballan neste ámbito. Para o goberno da Deputación da Coruña é unha obriga acompañar unha acción tan necesaria para camiñar cara á xustiza social e rematar coas desigualdades e a explotación dos pobos. Por iso contamos con liñas específicas de axuda a proxectos de cooperación internacional. Porque nada do humano nos é alleo e porque a transformación social reside, en gran parte, nas posibilidades de desenvolvemento que contribuamos a xerar en cada comunidade.

Goretti Sanmartín
Vicepresidenta da Deputación da Coruña e vogal do Fondo Galego de Cooperación e Solidariedade

*Artigo de opinión publicado en La Voz de Galicia con motivo do Día Internacional da Solidariedade Humana

    Este sitio web almacena cookies no seu computador. Estas cookies utilízanse para recompilar información sobre como interactúa co noso sitio web e permítenos lembralo. Utilizamos esta información para mellorar e personalizar a súa experiencia de navegación e para obter estatísticas e métricas sobre os nosos visitantes tanto neste sitio web como noutros medios. Para obter máis información sobre as cookies que utilizamos, pomos a disposición a nosa Política de cookies.
    Máis información