Ata o 2 de decembro ás 23.30 horas permanecerá aberta na páxina do Fondo Galego en Facebook a votación online para escoller as fotografías finalistas do concurso Imaxes con Fondo, que nesta terceira edición busca promover a reflexión arredor da interculturalidade. Un total de 84 obras, presentadas por 35 persoas, concorren na categoría adulta. Segundo consta nas bases da promoción, as e os internautas poden votar ata cinco fotografías que, ao seu xuízo, mellor:
- Poñan en valor os aspectos positivos da mestura entre nacionalidades, etnias, culturas, etc.
- Denuncien a discriminación de grupos pertencentes a culturas diferentes á dominante.
- Promovan o respecto á diversidade e mais o diálogo e a convivencia entre culturas.
- Revelen as auténticas causas de conflitos que adoitan presentarse como choques culturais.
- Desmonten estereotipos sobre as persoas doutras nacionalidades, etnias, culturas, etc.
- Contrarresten os discursos dos medios de comunicación hexemónicos ao respecto.
- Amosen a acollida ou outras actividades solidarias coas persoas migrantes ou refuxiadas.
- Amosen mobilizacións e accións reivindicativas a prol das persoas migrantes ou refuxiadas.
As 15 fotografías con máis votos pasarán á segunda fase, na que un xurado experto no eido da fotografía e do ámbito social seleccionará as obras gañadoras durante o mes de decembro. Para garantir unha maior transparencia e neutralidade, a autoría das imaxes manterase no anonimato, polo que se poden compartir pero sin citar explicitamente o nome do creador ou creadora. Para evitar a fraude, só se permiten cinco votos desde un mesmo navegador/ordenador.
A persoa gañadora do certame Imaxes con Fondo III realizará unha viaxe a Mozambique co fin de desenvolver un traballo fotográfico sobre a realidade do país lusófono e os proxectos alí apoiados polo Fondo Galego de Cooperación e Solidariedade. O segundo posto recoñecerase cunha cesta de produtos de comercio xusto e o terceiro cun lote de películas de temática social.