A exposición que conmemora os vinte anos do Fondo Galego estréase en Lugo

A exposición que conmemora os vinte anos do Fondo Galego estréase en Lugo

A exposición que conmemora os vinte anos do Fondo Galego estréase en Lugo 1199 870 Fondo Galego de Cooperación e Solidariedade

A mostra coa que o Fondo Galego de Cooperación conmemora os seus vinte anos de andaina estreouse hoxe en Lugo no marco da I Semana Intercultural organizada polo Concello e o colectivo Lugo Xusta. Os cubos da exposición '20 anos a Fondo coa solidariedade' permanecerán instalados na Praza Maior ao longo da semana para divulgar o labor realizado por esta rede de administracións locais comprometidas coa solidariedade internacional, recoñecida como axencia municipal da cooperación galega.

A concelleira de Benestar Social, Igualdade e Inclusión, Ana G. Abelleira, inaugurou a mostra canda a técnica do Fondo Galego, Carmen Novas, e a representante de Lugo  Xusta, Adela Figueroa. A edil enxalzou o compromiso do Concello de Lugo "para tratar de conseguir un mundo máis xusto, colaborando nos máis de 150 proxectos que o Fondo Galego ten levado a cabo en 25 países" ao longo destas dúas décadas de traxectoria.

Dar a coñecer a contribución de deputacións e concellos coma o de Lugo á erradicación das desigualdades Norte-Sur, ao tempo que se fomenta unha opinión pública favorable á cooperación para o desenvolvemento, é o obxectivo desta exposición, que contou no seu novidoso deseño co ilustrador Pepe Carreiro, autor dos sonados Bolechas. Os paneis fan un repaso pola orixe do Fondo Galego, os proxectos apoiados ao longo destas dúas décadas en países empobrecidos ou as actividades de sensibilización implementadas en Galicia, entre outros contidos.

    Este sitio web almacena cookies no seu computador. Estas cookies utilízanse para recompilar información sobre como interactúa co noso sitio web e permítenos lembralo. Utilizamos esta información para mellorar e personalizar a súa experiencia de navegación e para obter estatísticas e métricas sobre os nosos visitantes tanto neste sitio web como noutros medios. Para obter máis información sobre as cookies que utilizamos, pomos a disposición a nosa Política de cookies.
    Máis información