O alcalde de Barro, Xosé Manuel Fernández Abraldes, e a concelleira de Benestar Social de Silleda, Pilar Peón, participaron canda persoal técnico de senllas administracións na xuntanza da Comisión Executiva correspondente ao mes de setembro. No encontro déuselle a benvida oficial ao Fondo Galego de Cooperación e Solidariedade, xa que ambos os dous concellos veñen de sumarse á rede. A adhesión de novas administracións locais é unha das prioridades das Liñas Estratéxicas 2016-2019 da entidade.
"Incorporámonos ao Fondo Galego porque pensamos que os proxectos de cooperación internacional sempre son moi positivos", expresou Fernández Abraldes. "A pesar de sermos un concello pequeno e con posibilidades modestas, parecíanos importante contribuír co noso gran de area, pois a cooperación internacional é fundamental para buscar unha meirande igualdade social no mundo", concluíu.
En función da súa poboación, a Barro correspóndelle achegar unha cota anual de 392 euros, que serán reinvestidos tanto en accións de cooperación internacional como en actividades de sensibilización en Galicia. A xeito de benvida, o Concello recibirá próximamente a exposición 'Galicia-Cabo Verde: unha irmandade', coas fotografías de Rober Amado, e mais a actuación do grupo Batuko Tabanka, integrado por mulleres de orixe caboverdiana afincadas na Mariña lucense, co fin de promover a interculturalidade. Trátase de dúas das propostas que os concellos socios do Fondo Galego de Cooperación poden implementar para promover a defensa dos dereitos humanos, canda exposicións, concertos, charlas ou obradoiros.
A andaina destas actividades centrou precisamente un dos puntos da xuntanza da Comisión Executiva, na que tamén se deu conta do proxecto a prol da saúde infantil e materna apoiado en Mozambique e mais da reconstrución dun centro sanitario danado polas inundacións do outono nos campamentos saharauís. A axuda de post emerxencia tras o terremoto de Ecuador, a participación no Consello Galego de Cooperación ao Desenvolvemento, o programa de voluntariado internacional Vacacións con Traballo ou a próxima viaxe a Mozambique dun grupo de concelleiras galegas para intercambiar experiencias coas súas homólogas africanas foron outras das cuestións abordadas na xuntanza.