Son datos do informe feito público pola Comisión Española de Axuda ao Refuxiado con motivo do Día Internacional das Persoas Refuxiadas, que se celebra o 20 de xuño. A CEAR atribúe estas cifras ás dificultades para acceder ao asilo político en España.
As solicitudes admitidas finalmente a trámite foron 2.712, aínda que só o 9,5% das persoas solicitantes acadaron o estatuto de refuxiada ou refuxiado, mentres que o 17,4% recibiron protección subsidiaria.
O Alto Comisionado das Nacións Unidas para os Refuxiados (Acnur) pon de relevo no informe 'Tendencias globais' que en 2011, por quinto ano consecutivo, o número de desprazamentos forzosos en todo o mundo superou os 42 millóns, dos que 15,2 millóns corresponderon a persoas refuxiadas e 895.000 a solicitantes de asilo.
Os países en vías de desenvolvemento recibiron o ano pasado catro quintas partes da poboación refuxiada do mundo. Pakistán é o Estado que acolle máis persoas refuxiadas, seguido de Irán e Siria, mentres que Afganistán é o principal país emisor.